慘劇！法明奴爸爸家庭旅行期間猝死

今個夏天轉戰沙特阿拉伯嘅羅拔圖法明奴，趁國際賽休戰期間舉行家族旅行，一行十幾人去杜拜暢遊，估唔到樂極生悲，據報法明奴爸爸旅遊期間心臟病發離世，享年62歲。

據報法明奴一家人上周末去杜拜旅遊，就喺一張遊樂場大合照後冇幾耐，法明奴爸爸就心臟病發去世，巴西媒體《UOL》引述知情人士話：「法明奴爸爸係個大好人，好心地兼有趣，佢嘅突然離開令所有人都好意外。」

消息指法明奴正聯絡巴西駐阿聯酋大使館，希望將爸爸嘅遺體安排運返家鄉。法明奴喺早前出版嘅自傳入面，形容爸爸係佢嘅「超級英雄」：「唔係所有超級英雄都要披住斗篷，例如有一種英雄叫爸爸，我爸爸就係我細個嗰陣嘅超級英雄。」