再多3隊晉級決賽周　捷克出線領隊即劈炮！

歐國外進入尾聲，周二(21日)凌晨賽事後再多3隊晉級，包括C組嘅意大利、E組嘅捷克同H組嘅斯洛文尼亞。賽前爆出球員夜蒲醜聞嘅捷克，主場順利3比0大勝摩爾多瓦出線，不過領隊舒夏維喺領軍出線後，卻以「壓力太大」為由宣布辭職，捷克要另覓領隊打決賽周。

捷克賽前領先摩爾多瓦2分，如果摩爾多瓦贏波就可以直接超越捷克出線，賽前爆出華迪美高治爾等3名捷克國腳夜蒲，結果被逐離隊。好在捷克喺今場生死戰爭氣，杜迪拉14分鐘先開紀錄，下半場再由湯馬士塞利同湯馬士蘇錫克建功，大勝3比0以小組次名晉級。

捷克出線後，領隊舒夏維喺賽後訪問宣布：「雖然我哋依家好開心，但我喺賽前已經決定唔會再繼續執教，壓力實在太大，有時去到難以理解嘅地步，呢個係原因之一。」夜蒲醜聞發生後，舒夏維亦受到唔少批評，相信係舒夏維辭職嘅導火線。