冬季脫「魔」第一人　華拉尼或轉投拜仁

根據德國《天空體育》爆料，曼聯中堅華拉尼對於傷愈之後長期屈居後備感到不滿，有意明年1月冬季轉會市場重開後離隊，德甲勁旅拜仁慕尼黑計劃趁機簽入呢位30歲法國名將，舒緩防線人腳荒問題。

拜仁2位中堅馬菲斯迪歷特、烏柏美卡奴受到傷患問題困擾，教練杜曹認為有需要收購新中堅，並睇中華拉尼，已開始展開內部討論，睇下有冇可能簽入佢。據估計華拉尼身價為2,000萬鎊(約1.95億港元)，呢筆轉會費對於拜仁而言，問題不大，最大障礙係華拉尼年薪高達1,770萬鎊(約1.73億港元)，拜仁未必可以開出呢個人工簽佢，除非華拉尼願意減薪。

其實拜仁慕尼黑並非華拉尼唯一出路，早前傳出沙特阿拉伯球隊艾納斯想簽佢，以呢支中東豪門嘅財力，相信可以開出比佢現時人工更高嘅合約，問題係華拉尼到底想去沙特「養老」，亦或繼續留喺歐洲參加高水平賽事。