PSG新星為國捐軀　無緣今年餘下賽事

巴黎聖日耳門(PSG)中場沙利艾美利上場歐國盃外圍賽首次為法國上陣對直布羅陀，射入1球成為法國隊史上最年輕入波球員，但呢位17歲新星不幸傷出，經過詳細檢查之後，證實佢需要休息1個半月，無緣今年餘下賽事。

沙利艾美利該仗正選上陣，並喺上半場16分鐘入波，但建功後僅過4分鐘就受傷退下火線。根據PSG最新發表聲明，指沙利艾美利扭傷右腳足踝，並冇骨折情況，但仍然會缺陣今年餘下7場比賽，包括2場歐聯對紐卡素、多蒙特，以及5場法甲。

沙利艾美利上季冒起，今季更加成為PSG正選，各項賽事上陣15場入2球，屬於球隊排法甲榜首嘅功臣。由於PSG喺歐聯處於「死亡F組」，餘下2場對紐卡素、多蒙特，不容有失，沙利艾美利缺陣之下，對於PSG爭出線打擊甚大。