打甩官司　文迪向曼城索償1,000萬鎊！

前法國國腳班捷文文迪2年前捲入涉嫌強姦官司，隨即被曼城停賽兼停薪，並喺今年夏天約滿離隊。29歲嘅班捷文文迪年初獲判罪名不成立，已重返球場加盟法甲羅連安特，但佢對被曼城遺棄仍耿耿於懷，近日聘請律師向曼城追討欠薪，總額高達1,000萬鎊(約9,800萬港元)！

班捷文文迪被檢控後，曼城自2021年9月開始就冇再出糧畀佢，呢位法國守將依家獲得清白，決定向曼城追討賠償。英國《天空體育》報道，班捷文文迪聘請著名體育律師迪馬高做代表，以「無理扣薪」為由，向曼城追討合約期內每星期約10萬鎊(約98萬港元)薪酬，總額達到1,000萬鎊。

曼城喺2017年動用5,300萬鎊(約5.17億港元)由摩納哥收購班捷文文迪，打破當時英超後衞最高轉會費紀錄，但佢喺曼城表現未符預期，大部份時間都做後備。雖然班捷文文迪並非曼城主力，但亦隨隊贏過3次英超冠軍。