曼聯好消息　勞基梳爾有望復出對愛華頓

根據《ESPN》報道，曼聯傷兵問題有所改善，其中養傷3個月嘅左後衞勞基梳爾已經傷愈，最快有望下周一(27日)凌晨英超復出作客對愛華頓，對於左路防守鬧兵荒嘅紅魔鬼而言，無疑係天大喜訊。

勞基梳爾自從8月英超對熱刺一役受傷之後，一直養傷至今，導致曼聯需要向熱刺借用利古朗應急，但呢位西班牙國腳亦曾經受傷，一度需要中堅域陀連迪路夫客串左閘，勞基梳爾傷愈，對於球隊絕對係一場及時雨，特別係中堅莊尼伊雲斯早前亦受傷，勞基梳爾有能力勝任中堅位置，可以增加領隊坦哈格變陣靈活性。

另外，早前踢國際賽受傷嘅前鋒拉舒福特、門將奧拿拿嘅傷勢已經冇大礙，相信可以出戰愛華頓，月初受傷嘅雲比沙卡亦有望復出。