歐國外創造14球　般費已取代C朗核心地位

葡萄牙喺今屆歐國盃外圍賽10戰全勝出線，表現所向披靡，中場般奴費南迪斯為球隊創造14球，包括射入6球及8次助攻，呢位曼聯中場不知不覺已經取代巨星C朗嘅國家隊核心地位。

葡萄牙隊長C朗今屆歐國外入10球及2次助攻，數據上仍然出眾，但講到關鍵性作用，般奴費南迪斯更勝一籌，包括2次對同組最強嘅斯洛伐克，都成為主角，其中9月作客斯洛伐克，佢射入全場唯一入波，協助葡萄牙贏1比0，上月兩隊再碰頭，般費貢獻2次助攻，為葡萄牙贏3比2，否則無法10戰10勝。

般奴費南迪斯對於自己喺歐國外取得6個入球及8次助攻嘅亮麗數據，佢處之泰然：「每個人都想入波，都想發揮重要作用，我唔想評論個人表現，最重要係球隊整體踢得好。」般費表現甚有大將之風，相信將來C朗退出國家隊之後，佢應該可以接任做新隊長。