阿仙奴神童單場入10球　英格蘭搶人才

日前一場英超U16賽事，阿仙奴15歲前鋒奧比馬田個人獨取10球，帶領阿仙奴U16以14比3狂數利物浦U16，呢場神奇比賽亦引起各界關注，據報英格蘭足總已打算「搶人才」，希望可以喺丹麥手上召入呢位明日之星。

司職前鋒嘅奧比馬田只有15歲，但身高已經有1米88，上年加入阿仙奴青訓後備受好評，丹麥媒體形容佢踢法似域陀奧森漢，今個月初更獲領隊阿迪達邀請去跟一隊操練，證明球會對佢非常器重。日前喺U16聯賽對利物浦連入10球，令佢人氣急升。

奧比馬田分別代表過英格蘭U16同丹麥U17，上個月亦代表丹麥出賽，但英國《每日郵報》爆料，英格蘭足總正遊說奧比馬田代表英格蘭，丹麥U17領隊米高臣表示：「條例上佢係有權選擇，但我唔擔心，之前同佢家人傾過，話願意代表丹麥出賽，不過如果最終改變主意，亦唔到我哋控制。」