醫院爆棚　加維被逼推遲8日手術

巴塞隆拿中場加維周一(20日)凌晨為西班牙出戰歐國盃外圍賽對格魯吉亞，膝部韌帶嚴重受傷，原本會立即接受手術，但由於西班牙醫院手術室爆棚，導致呢位19歲新星被逼延遲8日做手術，令人擔心佢嘅傷勢可能惡化。

據悉加維嘅膝部十字韌帶撕裂，半月板亦嚴重受傷，巴塞隆拿方面曾經表示，會安排加維盡快接受手術，但根據西班牙傳媒最新報道，由於當地醫院手術室已經滿額，加維需要等到11月28日先至可以接受手術，呢段日子佢只可以留喺家中休息，認真無奈。

由於加維好大機會缺陣今季餘下賽事，巴塞隆拿準備明年1月冬季轉會市場重開後簽入中場，現時頭號目標係向熱刺借用盧施素，呢位27歲阿根廷國腳現時喺熱刺長坐冷板，加上佢喺貝迪斯打出名堂，應該樂於重返西甲。事實上，熱刺過去2季曾將盧施素外借去另一支西甲球隊維拉利爾，唔排除會接受巴塞借用要求。