華拉尼接班人係佢　曼聯睇中皇蘇中堅

盛傳曼聯中堅華拉尼好大機會離隊，會方需要物色接班人，根據西班牙《每日體育報》爆料，紅魔鬼睇中皇家蘇斯達中堅拿洛文特，有望以3,500萬歐元(約3億港元)收購呢位27歲西班牙國腳。

拿洛文特被譽為「新拿樸迪」，因為2人都喺法國出世，其後去西甲搵食，並選擇代表西班牙國家隊。身高1米87嘅拿洛文特勝在擁有不俗組織能力，今季西甲已經有1入球及1助攻，並保持88%傳球成功率，可以話係1位攻守兼備中堅，今年更加成為西班牙國家隊主力，並喺早前歐國盃外圍賽對格魯吉亞入1球。

曼聯主帥坦哈格着重中堅傳球能力，拿洛文特無疑係佢心目中最佳人選，據悉阿仙奴都有意搶購呢位猛將，估計佢身價為3,500萬歐元，現時2大英超球會加入爭奪，相信皇蘇會吊高來賣。

值得一提，拿洛文特現時合約違約金為6,000萬歐元(約5.1億港元)，如果曼聯想確保萬無一失簽入呢位中堅，可以考慮用呢個價錢直接買斷佢。