機會來了　一個原因蘭斯達爾周末可擔正

阿仙奴門將蘭斯達爾上季表現出色，但今季被新加盟嘅大衞拉耶搶走正選之位，曼聯名宿加利尼維利早前都為佢抱不平。周末英超阿仙奴作客賓福特，蘭斯達爾機會終於來了，因為根據借用規例，大衞拉耶唔可以倒戈，意味蘭斯達爾可望擔正，趁機證明身價。

阿仙奴今夏向賓福特借用大衞拉耶，有權明夏買斷呢位28歲西班牙國腳，所以佢現時只係以借用身份為兵工廠效力，根據英超規例，外借球員唔可以倒戈，大衞拉耶今場只能坐觀眾，蘭斯達爾順理成章會以正選上陣。

蘭斯達爾對上1次以正選身份踢英超，已經係9月初對曼聯，其後為英格蘭踢過1場熱身賽，以及出戰2場英聯盃，包括以1比0小勝賓福特，今場能否再次協助阿仙奴擊敗對手，大家拭目以待。