阿仙奴掛牌出售波蘭國腳　索價1.7億

剛喺國際賽有極佳表現嘅波蘭國腳積及基奧柯，無奈加盟阿仙奴以來長坐冷板，消息指「兵工廠」今個冬季轉會窗將佢掛牌出售，轉會費不低於2,000萬歐元(約1.7億港元)，多支意甲球隊表示興趣。

積及基奧柯今年初由史柏斯亞轉投阿仙奴，轉會費2,500萬歐元(約2.12億港元)，至今僅上陣16場入1球，今季上陣8次，未受阿迪達重用，反而佢喺最新一期波蘭國家隊有更多演出機會，擔任左中堅位置，最重要係佢只得23歲，仲有好大成長空間。

意大利傳媒報道，阿仙奴決定以不低於2,000萬歐元將積及基奧柯掛牌出售，唔接受借用，由於佢踢過意甲，多支意甲球隊如祖雲達斯、AC米蘭、拿玻里同羅馬都表示興趣，其中AC米蘭提出先借後買，阿仙奴並未答應。