阿仙奴中場換班　西甲猛將再成獵物

阿仙奴今季簽入迪格蘭賴斯，令中場實力大大增強，不過湯馬士柏迪同佐真奴都已經「3字頭」，前者更被傷患纏身，據報阿仙奴準備為中場換班，效力西甲皇家蘇斯達嘅蘇比文迪，就成為領隊阿迪達心儀目標。

據《Football Transfers》報道，阿迪達希望中場年輕化，迪格蘭賴斯成功取代格列沙加後，湯馬士柏迪、佐真奴同艾利尼3位防守中場都會被放棄，收購目標除阿士東維拉嘅杜格拉斯雷斯外，西班牙國腳蘇比文迪亦再入法眼，呢位24歲中場上季已被傳係阿仙奴目標，證明阿迪達對佢情有獨鍾。

蘇比文迪喺皇家蘇斯達表現出色，獲巴塞隆拿教練沙維大讚係「最佳組織型中場」，消息指佢合約內有5,300萬鎊(約5億港元)買斷條款，阿仙奴會考慮喺1月出手，不過巴塞隆拿、拜仁慕尼黑都對佢虎視眈眈，相信競爭唔細。