美斯被指偷食人妻女記　法比加斯老婆代闢謠

阿根廷「球王」美斯向來被視為模範老公，同青梅竹馬嘅洛古絲素結婚兼有3個細路，組織幸福家庭。不過近日有巴西媒體爆料，指控美斯背住洛古絲素，同阿根廷靚女記者蘇菲亞馬天尼絲「有路」，美斯夫婦並冇回應，估唔到最終由法比加斯老婆Semaan出嚟澄清。

巴西媒體《Direto Do Miolo》爆料，美斯婚姻出現重大危機，因為美斯背住老婆搭上阿根廷女記者蘇菲亞馬天尼絲，據報兩人早前喺金球獎已經眉來眼去，甚至引述西班牙傳媒消息，話美斯夫婦可能已經分居。不過，作為美斯一家「閨密」嘅法比加斯老婆Semaan，日前就搶先闢謠：「呢間係乜嘢媒體？報埋啲冇意思...而且冇樣真嘅報道。」

30歲嘅蘇菲亞馬天尼絲由上年世盃到金球獎，多次同美斯進行訪問，佢嘅記者老公萊高亦出面否認：「我完全唔知消息喺邊度出嚟，我哋夫婦感情好好。」美斯同洛古絲素自5歲已經相識，最後童話式結婚，相信呢啲無中生有嘅報道唔會影響佢哋一家嘅幸福。