遇強即屈　曼城患「名牌恐懼症」

曼城上場英超主場被利物浦逼和1比1，痛失榜首之餘，各項賽事主場23連勝亦斷纜，未能追平新特蘭1892年創造嘅英格蘭頂級聯賽球隊最長主場連勝紀錄。睇番「藍月亮」今季英超對傳統「Big 6」名牌球隊，並未能佔到優勢，衞冕之路難行。

曼城已經連續2場英超和波失分，對手正係豪門車路士及利物浦，加上10月作客不敵阿仙奴，意味「藍月亮」開季以來對傳統「Big 6」，只曾贏過今非昔比嘅曼聯，失去以往對爭標勁敵嘅優勢，曼城下輪聯賽主場另一支老牌勁旅熱刺，隨時再有失分危機。

曼城唔止患上「名牌恐懼症」，並且受一大「魔咒」困擾，就係自英超1992/93年球季創立以來，從未有球隊可以獲得4連冠，「藍月亮」連捧3季冠軍之後，「藍月王朝」可能已近尾聲。