11日踢4場大戰　曼聯「地獄賽程」搞唔掂

曼聯將於周一(27日)凌晨英超作客愛華頓，展開「地獄賽程」第一站，紅魔鬼將於11日踢4場大戰，賽前領隊坦哈格先戴定「頭盔」，指賽程太密成為球隊多傷兵嘅主因，必要時只能「放棄」部份比賽。

國際賽之後，曼聯面臨連場硬仗，未來3場都係作客，除咗鬥愛華頓之外，周四(30日)凌晨仲要遠赴土耳其，踢歐聯生死戰鬥加拉塔沙雷，跟住返回英超連接對2大豪門紐卡素、車路士，加上曼聯現時傷兵眾多，令球隊雪上加霜。

領隊坦哈格抱怨賽程太密，導致球員容易受傷：「所有領隊都不滿賽程安排，但每年比賽都增加，甚至已經超出球員所能承受嘅極限，有時只能夠作出取捨，一係配合賽程做足準備，一係放棄。」曼聯陷入「地獄賽程」，坦哈格到底會點樣取捨，大家拭目以待。

曼聯「地獄賽程」

27/11 英超作客Vs愛華頓

30/11 歐聯作客Vs加拉塔沙雷

3/12 英超作客Vs紐卡素

7/12 英超主場Vs車路士