比寧咸復出即入波　破C朗紀錄率皇馬大勝

周一(27日)凌晨西甲，皇家馬德里作客3比0大破卡迪斯，英格蘭球星祖迪比寧咸因傷休戰2場後，復出即刻有波入，令佢打破C朗拿度同迪史堤芬奴2大傳奇嘅入球紀錄。

皇馬今場表現生猛，洛迪高高斯14分鐘個人表演轟入靚波，呢位狀態大勇嘅巴西前鋒，64分鐘再施展腳法帶入中路狂抽射成2比0。74分鐘洛迪高高斯再次策動攻勢，左路交畀後上嘅祖迪比寧咸窄位射入，協助皇馬大勝3比0。

今場係祖迪比寧咸第15次為皇馬披甲，攻入個人第14球，打破C朗拿度同迪史堤芬奴保持嘅皇馬頭15仗入球紀錄(13球)。祖迪比寧咸比賽尾段被換走，皇馬教練安察洛堤賽後解釋：「比寧咸個膊頭未好番晒，但佢戴住護具感覺良好，傷患唔係問題。」