11月唯一英超全勝　坦哈格攞硬每月最佳

曼聯迎接「地獄賽程」之前，先喺聯賽大炒愛華頓3比0，呢場波不單士氣大振，亦令球隊成為英超11月唯一全勝兼無失球球隊，11月最佳領隊成為坦哈格囊中物，不過佢同時亦係下位被炒領隊榜首人選，感覺矛盾。

紅魔鬼近期表現大起大跌，上月底至本月初剛經歷曼市打吡大敗同英聯盃出局，之後再喺歐聯輸畀哥本哈根，坦哈格面臨下台危機，多間傳媒估計佢捱唔到聖誕，甚至有大膽推斷，坦哈格會喺12月18日對利物浦後被炒。

喺不利消息滿天飛情況下，曼聯喺聯賽總算交到貨，11月3場聯賽，分別贏富咸1比0、贏盧頓1比0，以及贏愛華頓3比0，3連勝入5球0失球，單計成績係11月英超之冠，所以多間傳媒推斷，坦哈格將在全無對手下獲得11月最佳領隊。

不過坦哈格條命可能就係咁大喜大悲，贏完3支下游隊，曼聯嚟緊將要應付「地獄賽程」，先喺歐聯作客加拉塔沙雷，跟住12月踢8場波，計有聯賽作客紐卡素、主場對車路士，歐聯主場對拜仁慕尼黑，同聯賽作客利物浦等硬仗，令坦帥攞完最佳領隊，又要繼續面對下台壓力。