估你唔到！曼聯計劃1月簽迪姆華拿！

曼聯近期成績回升，不過前鋒入球不足仍然係一大死穴，1月轉會窗簽前鋒事在必行，德國《天空體育》就爆出曼聯新目標人物，竟然係曾效力車路士嘅RB萊比錫前鋒迪姆華拿，消息指曼聯已作出初步接觸，未來幾星期會決定係咪正式提出收購。

德國《天空體育》著名記者Florian Plettenberg報道，曼聯近日接觸RB萊比錫，詢問收購迪姆華拿嘅可能性，不過目前未有正式收購行動。消息指迪姆華拿今季未受重用，已萌生重返英超嘅念頭，韋斯咸同富咸都傳出有意向佢招手，估唔到連曼聯都想加入戰團。

27歲嘅迪姆華拿曾效力車路士2季，被批評把握力差勁，但都幫車路士拎過1次歐聯冠軍，上季以「半價」重返RB萊比錫，喺德甲只有9個入球，今季更加淪為後備，8次聯賽上陣只得2場係出任正選。迪姆華拿目前身處曼徹斯特，因為佢正隨RB萊比錫喺歐聯作客曼城。