E組提早收工　馬體會拉素一齊贏波出線

周三(29日)凌晨歐聯E組，馬德里體育會同拉素一齊贏波，攜手出線，飛燕諾輸波後，以小組第3位獲得歐霸盃資格，些路迪篤定排包尾，意味E組形勢提早1輪塵埃落定。

賽前飛燕諾僅落後榜首馬體會2分，只要贏波就可以反超前對手，點知呢支荷甲球隊主場出擊，竟然連番「送禮」，開賽14分鐘就有後衞基爾圖特亞擺烏龍，導致落後。

換邊之後，馬體會由中堅馬里奧靴莫素射成2比0，雖然飛燕諾靠韋費亞頂入追至1比2，但係首席射手辛迪亞高基文尼斯81分鐘防守對方罰球，頂入自己龍門，而且動作似足攻門，難怪被網民嘲諷佢搞錯進攻方向。

同組另一場，拉素靠後備上陣嘅前鋒恩莫比尼喺比賽末段連入2球，主場以2比0擊敗些路迪，落後榜首馬體會1分，雙方將於下輪交手，爭奪小組首名。