科頓1傳1射　曼城半場落後2球都反勝

周三(29日)凌晨歐聯G組，兩支已經提早出線球隊交鋒，上屆冠軍曼城即使上半場落後2球，但換邊之後發力，菲爾科頓貢獻1次助攻及射入1球，主場以3比2反勝RB萊比錫，5戰全勝鎖定小組首名。

曼城上場英超被利物浦逼和之後，今場歐聯亦顯得神不守舍，防線連番犯錯，被RB萊比錫2次反擊得手，造就奧賓達個人梅開二度。

曼城主帥哥迪奧拿下半場初段作出3個調動，換入尼敦阿基、祖利安艾華利斯、謝利美杜古，果然立竿見影，菲爾科頓直傳，艾寧夏蘭特單刀射入，成為史上最年輕取得40個歐聯入波嘅球員，跟住菲爾科自己亦入番1球，扳平2比2。

戰至87分鐘，祖利安艾華利斯近門射入絕殺對手，呢位阿根廷國腳踢14場歐聯入7球及3次助攻，效率極之高。值得一提，曼城3位入波球員都係2000年出世，「藍月亮」骨幹非常年輕，仲有排威。

同組另1場，年青人主場以2比0擊敗貝爾格萊德紅星，肯定排小組第3位，取得歐霸盃資格。