曼聯將舉行民調　決定格連活特命運

格連活特今季被曼聯外借去基達菲之後有出色表現，上陣11場入4球，英國《太陽報》指領隊坦哈格希望收回呢位22歲前鋒，但礙於輿論壓力，一直猶豫不決。據悉曼聯將舉行1次詳細民意調查，了解球迷、贊助商等相關人士，願唔願意重新接納呢位「家暴男」，再決定是否收回格連活特。

由於格連活特上年捲入毆打女友事件，雖然已經獲警方撤銷控罪，但始終未能洗脫「家暴男」形象，特別係曼聯女足非常反對佢歸隊。不過，隨住格連活特喺西甲有出色表現，坦哈格希望搵佢幫手，解決鋒線疲弱問題，曼聯管理層為顧及球會形象及商業利益，唔可以貿然請格連活特回巢，所以最好搵民意支持，如果民調結果顯示普遍人士肯「原諒」格連活特，會方就有大條道理收回佢，否則只能繼續將格連活特「流放」。