猜猜我是誰　拜仁球星變咗「木乃伊」

拜仁慕尼黑將於周四(30日)凌晨歐聯A組主場對哥本哈根，呢支德甲勁旅操練時出現「木乃伊」，首季去德國搵食嘅前鋒哈利卡尼，同隊友一樣由頭包到落腳，抵抗當地冬天寒冷天氣，遠睇似足「木乃伊」。

慕尼黑氣溫已經跌至攝氏零下2度，並且開始落雪，球員操練期間都做足禦寒工作，哈利卡尼最誇張，連面部都包住，只露出雙眼，唔少網民擔心比賽期間，佢會被「凍僵」影響入球能力。

幸好拜仁慕尼黑已經提早取得小組首名出線，就算哈利卡尼到時唔出場，都冇所謂。