法比奧韋拉受傷長抖　阿迪達提拔2位小將幫手

阿仙奴領隊阿迪達透露，中場法比奧韋拉因為腹股溝受傷，可能需要接受手術，今年餘下賽事，無法再上陣，並提拔2位青年軍球員路易斯史基利、華尼利上一隊參加操練，以備不時之需。

阿迪達話：「專家建議法比奧韋拉開刀，估計佢歇冬之前，唔會再上陣。」預料呢位23歲葡萄牙球員可能要等到明年1月20日英超對水晶宮，先至可以復出。

阿仙奴現時頗多中場傷兵，除咗法比奧韋拉之外，湯馬士柏迪、伊美路維亦有傷在身，所以阿迪達搵來16歲中場華尼利、17歲中場路易斯史基利，參加一隊操練，2人近期喺U21青年軍表現出色，華尼利更加有望出戰周四(30日)凌晨歐聯主場對朗斯，值得各位「廠迷」留意。