坦哈格換錯人斷送江山　完場照樣笑得開心

曼聯喺歐聯大好形勢下再度失分，出線機會變得非常渺茫，除咗門將奧拿拿「孭晒鑊」之外，領隊坦哈格嘅換人亦被指係球隊崩潰原因之一，而呢位荷蘭教頭完場後笑晒口同舊部薛耶治聚舊一幕，更令曼聯球迷睇到眼火爆！

曼聯今仗頭1個鐘頭表現唔差，當麥湯米尼55分鐘射成3比1後，坦哈格就搶先撳掣，換走表現突出嘅海倫同蘇夫恩岩拉伯特，但呢個調動就令控制戰局嘅曼聯突然失勢，喺60分鐘至75分鐘被加拉塔沙雷壓住踢，並且連失2球。數據顯示，入替海倫嘅安東尼馬迪爾，30分鐘內只有2次喺對方禁區觸球，明顯入唔到局。

完場後曼聯仲未知係咪提早出局，因為同組拜仁慕尼黑同哥本哈根仍未開波，不過坦哈格心情唔算太差，同對手射入2球嘅薛耶治更笑住咁擁抱，兩人之前曾經喺阿積士合作，今次重逢當然趁機聚舊，不過曼聯球迷見到就好不滿，紛紛留言鬧爆：「見到球隊踢成咁，個領隊仲笑得出？」、「如果領隊係費格遜，佢會嬲到唔同人握手走番更衣室」、「究竟佢有幾關心曼聯嘅成績？」