阿仙奴派6蛋　提早鎖定首名晉級

闊別歐聯6季嘅英超勁旅阿仙奴，周四(30日)凌晨主場6比0狂數朗斯後，提前一輪鎖定B組首名出線席位。統計顯示，阿仙奴過去20次出戰歐洲賽(15次歐聯、5次歐霸)，全部都能夠喺分組賽晉級。

阿仙奴今場大開殺戒，夏維斯13分鐘先開紀錄，打開缺口嘅「兵工廠」，喺21至27分鐘再入多3球，加比爾捷西斯、布卡約沙卡同加比爾馬天尼利各建一功，完半場前馬田奧迪加特再入一球，帶住5比0優勢返更衣室。下半場朗斯加強防守，阿仙奴去到86分鐘獲得12碼，佐真奴操刀射成6比0完場。

阿仙奴今場火力全開，成為首支喺歐聯半場領先5球嘅英超球隊，領隊阿迪達賽後表示：「我哋知道今場可以完成任務，而球隊用漂亮一仗嚟實現，我哋上半場攻入一支好好嘅球隊5球，領先咁多好容易會失去專注，但我哋下半場仍然保持集中，各方面都有好嘅結果。」