紐亞神奇3連救　拜仁分組賽6年未輸過

周四(30日)凌晨歐聯分組賽A組，已篤定出線嘅拜仁慕尼黑，主場0比0打和哥本哈根，呢個戰果令榜尾嘅曼聯保留一絲出線希望。拜仁今場失分，令佢哋歐聯分組賽17連勝走勢斷纜，但連續39場分組賽不敗走勢延續，對下輪必需贏拜仁嘅曼聯嚟講，似乎係個壞消息。

拜仁今場繼續強陣，哈利卡尼喺前線掛帥，不過面對決心十足嘅哥本哈根未見太大優勢，全場只有2次中龍攻門，若非門將紐亞喺87分鐘上演「神奇3連救」，哥本哈根有權絕殺贏波送曼聯出局，最終兩隊0比0握手言和。

拜仁教練杜曹賽後不滿球隊表現：「喺冇出線壓力之下，我原本預期球隊會踢得更放，我覺得球員未夠努力。」雖然拜仁慕尼黑已肯定首名出線，但佢哋喺分組賽嘅穩定性非常驚人，對上一次輸波已經係6年前輸畀巴黎聖日耳門。