阿迪達慧眼　夏維斯定位成功大爆發

阿仙奴今夏用6,500萬鎊(約6.4億港元)收購德國國腳夏維斯，季初表現低沉引嚟唔少批評，不過呢位24歲球星近期爆發，連續2場貢獻關鍵入波，今季被領隊阿迪達定位「左中場」後開始適應，有望成為阿仙奴嘅核心。

夏維斯天才橫溢，不過被指「周身刀，冇張利」，喺車路士踢過中鋒、「假9號」左右翼同進攻中場，最近喺德國國家隊仲踢埋左翼衞，不過阿迪達就堅持佢最佳位置係「左中場」，今季除社區盾踢箭頭外，每次正選都係踢3人中場嘅左路，代替格列沙加位置。

阿迪達早前表示：「格列沙加係球隊鎖匙，佢用咗一段長時間去適應我畀佢嘅工作，尤其係改變位置之後，當時佢受到好多質疑，但最後都發揮得好好，依家(夏維斯)嘅情況亦同一樣。」連埋國際賽在內，夏維斯近4場比賽入3球，上場對朗斯先開紀錄外，仲交出2次關鍵傳送，4次爭頂3次成功，攻守兼備，賽後獲選為全場最佳球員，似乎逐漸適應阿仙奴嘅角色。