奧脫福爆食物中毒　曼聯遭調查

曼聯主場奧脫福球場嘅餐廳爆出食物中毒事件，根據《The Athletic》報道，有多人報稱，參加奧脫福舉行嘅活動，進食雞肉之後，出現身體不適，疑似食物中毒，曼徹斯特地區委員會已經介入調查，曼聯會方拒絕作出評論，只係透露正在進行內部調查。

據悉有訪客可能食咗帶有沙門氏菌嘅雞肉，導致出現腹瀉、發燒、胃痛、嘔吐等症狀，曼徹斯特地區委員會同曼聯會方調查該批訪客出現食物中毒症狀，是否同食咗奧脫福球場餐廳嘅食物有關，亦或感染其他疾病。

曼聯一直透過喺奧脫福球場舉行餐飲活動，賺取豐厚收入，餐廳亦獲得衞生當局評為最高級別嘅「5級」，代表衞生情況非常好，但經過今次疑似食物中毒事件之後，可能會被降級，甚至面臨停業危機，意味球會需要花費大量金錢及時間改善衞生情況，影響曼聯財政收入。