一個原因　曼聯仲想同馬迪爾續約

曼聯前鋒安東尼馬迪爾長期表現低迷，呢位27歲法國國腳將於明夏約滿，外界估計紅魔鬼會放走呢位「冗員」，節省薪酬支出，不過根據英國傳媒爆料，曼聯仍然打算觸發自動續約1年條款，留住安東尼馬迪爾，以便爭取時間搵買家接貨，避免人財兩失。

安東尼馬迪爾今季17次上陣僅入2球，但卻坐擁25萬鎊周薪，會方早已經計劃出售佢，但一直冇球會願意買斷呢位前鋒。安東尼馬迪爾剩下半年合約，明夏可以自由身離隊，但曼聯仍然希望從佢身上收回轉會費，避免「完全報廢」，所以準備同馬迪爾續約1年。

不過，根據德國《轉會市場》統計，安東尼馬迪爾身價只值1,300萬鎊(約1.29億港元)，佢現時年薪亦高達1,300萬鎊，就算曼聯同馬迪爾續約，再賣走佢，都唔會賺到幾多，更何況馬迪爾可能繼續無人問津，屆時球會就白白蝕多1年1,300萬鎊人工，曼聯呢招可以話係高風險、低回報。