雙閘貢獻助攻　阿仙奴今年入球破100大關

周六(2日)深夜英超，榜首阿仙奴保持強勢主場以2比1擊敗狼隊，各項賽事取得5連勝，兵工廠亦成為今年第5支入波突破100大關嘅歐洲5大聯賽球隊，果然有姿態有實際。

阿仙奴今仗雙閘齊飛，開波僅6分鐘，右後衞富安健洋直傳，布卡約沙卡射入打開紀錄，僅過7分鐘，輪到左後衞辛真高貢獻助攻，回傳畀馬田奧迪加特射成2比0。兵工廠2023年各項賽事總入波達到101球，成為繼曼城、皇馬、拜仁慕尼黑、利華古遜之後，今年第5支入波破百嘅歐洲5大聯賽球隊。狼隊臨完場由前鋒馬菲奧斯根夏勁射入網破蛋，但無阻阿仙奴全取3分。

阿仙奴近期表現銳不可當，歐聯及英超合共取得5連勝，近11場主場更加獲得9勝2和，加上下仗對手只係作客弱隊盧頓，相信兵工廠可以延續長勝走勢。