坦哈格即場鬧爆馬迪爾　大膽反駁等入冷宮

曼聯喺英超0比1不敵紐卡素，意外獲派擔任正選箭頭嘅安東尼馬迪爾，表現令人失望，佢更因為冇履行防守戰術，比賽期間被坦哈格即時喺場邊喪鬧，但迪爾亦不甘示弱，攤開雙手表現出對指責不滿，隨時會被小器嘅坦哈格打入冷宮。

馬迪爾上場聯賽對愛華頓有入波，今場意外取代海倫擔正，但佢成個上半場都冇喺對方禁區內掂過波，更多次冇去看管紐卡素中堅法比安舒哈，其中一次法比安舒哈引球長驅直進製造攻門，幾乎造就米基爾阿米朗入波後，坦哈格即喺場邊破口大罵，而馬迪爾亦出口還擊，攤大雙手以示不滿。

踢到60分鐘，馬迪爾同拉舒福特率先被換走，負責評述嘅前紐卡素球星贊拿斯表示：「呢幕就係曼聯依家嘅文化，大家都係攤大雙手、互相指責，一啲團結都睇唔到。」大批網民亦留言：「馬迪爾喺場上做過咩？」、「坦哈格又同另一個球員反面」、「唔該佢兩個季尾一齊走」......