拜仁聯賽改期　古拉斯趁機拉近卡尼入球距離

原本周六(2日)晚舉行嘅德甲拜仁慕尼黑主場對柏林聯，因為天氣惡劣改期，前鋒哈利卡尼冇得數胡，同日史特加前鋒古拉斯唔客氣，射入1球12碼，協助球隊以2比0擊敗雲達不來梅，個人今季聯賽入波增至16球，僅落後射手榜一哥哈利卡尼2球。

慕尼黑落大雪，各類公共交通服務停止服務，導致大量球迷無法前往球場，賽會考慮球迷安全問題之後，決定將拜仁慕尼黑主場對柏林聯改期，《圖片報》指可能安排明年1月歇冬之後補賽。

其他德甲賽事如期舉行，其中「神奇球隊」史特加愈戰愈勇，今仗憑安達夫、古拉斯各建一功，主場贈雲達不來梅兩蛋，取得聯賽3連勝。

古拉斯已經連續6場聯賽主場入波，對上1位做出呢個壯舉嘅史特加球員，已經係2007/08年球季嘅馬里奧高美斯，難怪包括曼聯在內嘅歐洲大球會都有興趣收購呢位27歲幾內亞國腳。

另1場德甲，RB萊比錫主場以2比1擊敗海登咸，奧賓達繼上場歐聯對曼城，梅開二度之後，今場又射入1球12碼，腳風非常順。