4球世界波！利物浦4比3戲劇性贏富咸

今季重返爭標行列嘅利物浦，周日(3日)英超上演「金球Show」，主場轟入4個世界波下4比3戲劇性擊敗富咸，領隊高普賽後直指呢場係令球迷「一世難忘」嘅精彩賽事。

利物浦今仗20分鐘開紀錄，阿歷山大阿諾特主射罰球直飛死角，中楣底後彈中賓特尼奴入網，富咸4分鐘後由哈利威爾遜追平，不過利物浦中場阿歷斯麥亞里士打38分鐘展功架，離門30碼起腳轟入死角，可惜後防錯漏百出，完半場前又被富咸門前混戰射入，半場踢成2比2。

踢到尾段高潮迭起，卜比列特80分鐘頭槌為富咸領先3比2，以為利物浦將會失分，日本中場遠藤航87分鐘禁區頂撞射轟入上角，1分鐘後阿歷山大阿諾特再喺禁區邊割草式勁射入網，幫利物浦贏4比3全取3分。

「紅軍」領隊高普賽後興奮表示：「踢到3比3嗰陣，你見到班球員非常渴望勝利，喺運氣幫助下成功咗。今場對所有入場嘅人都係頂級體驗，賽前冇人會諗過，利物浦對富咸會係令你一世難忘嘅比賽......我睇過唔少比賽，但從未睇過一場波會有咁多世界波！」