菲歷斯射爆馬體會　霸氣慶祝盡吐烏氣

周一(4日)凌晨西甲大戰，巴塞隆拿主場1比0擊敗馬德里體育會，贏波功臣正正就係倒戈嘅祖奧菲歷斯！呢位葡萄牙國腳今夏同馬體會不歡而散，以借將身份射爆馬體會後，更走去客隊球迷面前挑釁性慶祝，盡吐烏氣！

祖奧菲歷斯上季被馬體會打入冷宮，佢同教練施蒙尼亦因戰術問題不和，最終寧願大幅減薪都要外借加盟巴塞隆拿，受到馬體會球迷炮轟。祖奧菲歷斯去到巴塞後狀態大勇，今場28分鐘更盡展功架，接應拉芬夏比洛尼妙傳後殺入禁區，乖巧笠過出迎嘅門將射入。祖奧菲歷斯雖然仲係由馬體會「擁有」，但佢亦唔介意得罪人，走去馬體會球迷區面前張開雙手慶祝，極盡挑釁。

祖奧菲歷斯嘅行為引起馬體會球員不滿，中堅荷西基文尼斯更喺比賽中問祖奧菲歷斯「係咪想打交？」馬體會中場馬高斯洛蘭迪賽後表示：「我冇睇到祖奧菲歷斯入波後做乜，亦唔在乎，每個人都要為自己行為負責。」至於巴塞教練沙維就話：「慶祝入波好正常，我賽前提佢要保持冷靜，因為呢啲『額外動力』有時會令你失控，我好開心佢效力巴塞。」