唔敢相信！曼聯今季未因失誤直接失波

雖然成日講數據唔呃人，但都有例外，嗰隊就係曼聯。據一個足球分析網站公布數據，曼聯竟然係今季英超唯一一支未有因失誤直接導致失球球隊，真係估你唔到。

《WhoScored》公布新一輪英超數據，在今輪英超之前，僅餘韋斯咸、熱刺同曼聯係未有因失誤直接導致失球嘅3支球隊，但今輪賽事，韋斯咸嘅馬夫洛柏路斯同熱刺嘅比蘇馬都出現失誤，導致球隊失波，韋斯咸同熱刺嘅清白身都保唔住。

雖然曼聯今輪聯賽作客紐卡素輸0比1，但所失一球並非失誤所致，因此曼聯成為今季英超唯一一隊未因失誤導致直接失波球隊，即使紅魔鬼後防經常蝦碌，門將奧拿拿更經常鬧笑話，但數據就係咁，佢哋今季所失17球全部並非失誤造成，可能係對手進攻太強，或自己後防太弱，總之同失誤無關。