反超坦哈格　錫菲聯主帥率先被炒

曼聯領隊坦哈格早前一度升上被炒英超領隊榜首，坦哈格未有事，錫菲聯主帥希京保頓於周一(4日)被炒，成為今季英超首位下台領隊，前主帥韋達將回巢領軍。

錫菲聯今季重上英超以來，14戰僅得1勝2和11負，得11球失39球，係英超入波最少同失波最多球隊，攻不銳守不穩，希京保頓一直高踞被炒領隊榜首位置，但上月初被坦哈格取代，直至今輪作客般尼嘅護級大戰大敗0比5，錫菲聯跌至榜尾，希京保頓亦失去領隊工作。

多間傳媒報道，錫菲聯於周一召開董事會後，決定解僱希京保頓，結束在該隊2年執教生涯，亦係今季英超首位落台主帥，至於2016至2021曾在錫菲聯執教嘅韋達將會回巢，接任教鞭並展開救亡之旅。