紐尼斯新Look劣評如潮　英超最敗家前鋒

利物浦今季愈戰愈勇，進攻火力非常強勁，不過烏拉圭前鋒達雲紐尼斯嘅表現就受到唔少質疑，日前對富咸一戰佢以「孖辮」新造型亮相，但就繼續展示超弱嘅把握力，錯失2次黃金機會，數據顯示佢今季係英超「最敗家前鋒」，數據同佢個新髮型一樣咁駭人。

達雲紐尼斯今季各項賽事有7個入波同6次助攻，成績其實相當唔錯，但如果佢嘅把握力同運氣好啲，成績表會更加靚仔。據Understat數據，達雲紐尼斯今季英超xG(預期入球)係8.18球，但現實只入4球，負4.18球嘅落差係英超之冠，衰過海倫(負3.01球)同尼高拉斯積遜(負2.29球)，榮登英超敗家之王。

對富咸一仗屢失良機後，大批網民借佢個新Look鬧爆：「記得保羅普巴每日換新髮型，但表現係災難，我唔想紐尼斯都係咁」、「呢個孖辮妹係乜水？好似唔識踢波咁」、「老實講我唔理佢髮型點，只在乎佢入唔入到波」、「高普嘅耐性唔會係永無止境」......