卡華積緣盡今年賽事　皇馬傷兵增至7人

西甲榜首皇家馬德里嘅傷兵問題惡化，右後衞丹尼爾卡華積亦加入「十字兵」行列，呢位31歲西班牙國腳因為左腳肌肉受傷，需要休息4星期，意味將缺陣今年餘下賽事，皇馬傷兵增加至7人。

皇馬上場西甲對CF格蘭納達，丹尼爾卡華積踢完上半場就退下火線，根據軍醫透露，佢最快都要明年1月先至可以復出，希望趕及出戰下月11日凌晨西超盃對馬體會。皇馬今年仲有4場比賽，包括西甲對貝迪斯、維拉利爾、艾拉維斯，歐聯對柏林聯，丹尼爾卡華積養傷之下，預料會由盧卡斯華斯基斯擔任正選右後衞。

除咗丹尼爾卡華積之外，皇馬其餘傷兵仲有泰拔高圖爾斯、艾達米列達奧、曹亞文尼、阿拉巴、卡馬雲加、雲尼斯奧斯祖利亞，令教練安察洛堤非常頭痛。