蘇亞雷斯告別甘美奧　加盟邁亞密好事近！

烏拉圭前鋒蘇亞雷斯同「球王」美斯再次合體好事近！甘美奧周一(4日)巴甲主場謝幕戰後，蘇亞雷斯同家人向甘美奧球迷感人道別，據轉會權威Fabrizio Romano報道，蘇亞雷斯短期內會同國際邁亞密完成簽約細節，進軍美職同老友美斯拍住上。

36歲嘅蘇亞雷斯寶刀未老，佢同甘美奧合約今個月底完結，周一對華斯高係佢最後一次喺甘美奧主場上陣，蘇亞雷斯亦不負所託，一箭定江山助球隊贏波，完場後佢同家人一齊喺球場上同球迷道別，場面相當感人。

Fabrizio Romano爆料，蘇亞雷斯好大機會以自由身加盟國際邁亞密，雙方將會傾談合約最後細節，目前安排係簽1年合約，但正考慮加入續約1年嘅條款。蘇亞雷斯同美斯喺巴塞隆拿年代合作無間，場外亦情同兄弟，喺美職再合約將成一時佳話。