車路士好消息　尼干古有望復出鬥曼聯

車路士將於周四(7日)凌晨英超作客曼聯，大戰前夕「藍戰士」迎來好消息，季前受重傷一直缺陣嘅進攻中場尼干古近日已經傷愈復操，有望復出鬥紅魔鬼，無疑可以提升車路士勝算。

尼干古今夏以5,200萬鎊(約5.1億港元)轉會費由RB萊比錫加盟車路士，但卻於季前熱身賽整傷膝部，需要接受手術，至今仍未為車仔踢正式賽事，打亂領隊普捷天奴部署。幸好呢位26歲法國國腳早前已經復操，原本有機會踢上場英超對白禮頓，但普帥為安全起見，畀佢準備多幾日，預料今場有機會候命。

尼干古上季為RB萊比錫各項賽事上陣36場入23球及9次助攻，包括以16球成為德甲神射手，佢復出必定可以增強車路士攻力。值得一提，尼干古曾於3年前歐聯分組賽貢獻助攻，協助RB萊比錫主場以3比2擊敗曼聯，今場等睇佢表演。