馬迪爆料：曼聯球員操練經常遲到

曼聯同車路士將於周四(7日)凌晨英超交鋒，曾經效力過呢2支球隊嘅尼曼查馬迪爆料，指車仔球員操練非常準時同專業，反觀紅魔鬼球員經常有人遲到，包括保羅普巴、查頓辛祖。

尼曼查馬迪曾經2度效力車路士，包2014至2017年，其後轉投曼聯，直至2022年夏天離隊加盟羅馬，今夏已轉投法甲球隊雷恩，佢接受傳媒訪問時話：「效力車路士時期，球員表現好專業，訓練唔會遲到，但係曼聯球員遲到問題經常發生，包括保羅普巴、查頓辛祖，好嬲呢種人，所以當時成立內部紀律委員會，由我擔任主席，去處理遲到問題，曾經有一季收到7.5萬鎊(約74萬港元)遲到罰款，可見情況有幾嚴重。」

保羅普巴效力曼聯期間以懶散見稱，最終被球隊放棄，現任主帥坦哈格曾批評查頓辛祖操練表現欠佳，將佢打入冷宮，一度引起爭議，但根據尼曼查馬迪咁講，坦哈格處罰辛祖一事，可能冇做錯。