域陀奧森漢同意續約　拿玻里開出「闊佬條款」

根據意大利傳媒爆料，拿玻里射手域陀奧森漢已經同意續約至2026年夏天，除咗獲得加薪至1,000萬歐元(約8,400萬港元)年薪之外，亦唔會阻止佢明夏轉會，令雙方達成協議。

域陀奧森漢上季意甲上陣32場入26球，成為球隊奪得聯賽冠軍嘅功臣，佢亦獲得神射手殊榮，今夏已經傳出多支球隊有意收購呢位24歲尼日利亞國腳，但拿玻里要求1.5億歐元(約12.6億港元)以上轉會費，令交易未能成事，導致域陀奧森漢甚為不滿。加上早前發生球會官方社交網發布嘲諷奧森漢嘅短片，令雙方關係幾乎破裂，續約問題亦停滯不前。

由於域陀奧森漢只剩下一年半合約，最終拿玻里管理層讓步，滿足域陀奧森漢加薪至1,000萬歐元年薪嘅要求，同時加入條款，若然有其他球會明夏開出高價收購，會方願意放人。

盛傳車路士計劃收購域陀奧森漢，佢下季可能登陸英超。