雲迪碧克向巴塞自薦　對方有疑慮

今季僅為曼聯上陣2場嘅荷蘭中場雲迪碧克，正尋求明年1月冬季轉會窗離隊，據報佢已向巴塞隆拿自薦，但對方對此感到疑慮。

《每日體育報》報道，雲迪碧克再難忍受喺曼聯坐冷板，決心求去，向巴塞隆拿自薦，選擇巴塞原因係對方早在2019年曾經向阿積士斟佢，但未能成事，雲迪碧克最終以4,000萬歐元轉投曼聯。

巴塞今季先後有法蘭基迪莊及加維受傷，中場需要補充兵力，冬季轉會窗將會增兵，於是雲迪碧克向巴塞自薦，無奈嘅係，巴塞對於雲迪碧克嘅狀態同表現都有疑慮，並未有任何表示。

另邊廂，如果雲迪碧克去唔成巴塞，可以考慮祖雲達斯，因為「斑馬兵團」有意簽佢，並已展開行動進行接觸，希望以先借後買方式同曼聯交易。