黃喜燦今季第8球　多過紐尼斯一倍

周三(6日)凌晨英超，狼隊憑黃喜燦射入全場唯一入球，主場以1比0擊敗般尼，呢位27歲南韓國腳今季聯賽已經有8球進帳，直逼入9球嘅同胞孫興民，甚至多過利物浦貴價射手達雲紐尼斯一倍入波數字。

般尼上仗大勝錫菲聯5比0，今仗亦幾乎先開紀錄，積洛迪古斯近門起腳被門將丹尼爾賓尼擋出，祖殊布朗曉爾補射又被丹尼爾賓尼撲到。狼隊避過一劫果然有後福，上半場42分鐘把握對手防線犯錯，發動反攻，最後由黃喜燦射入，佢近3場英超入2球，狀態相當勇猛。

黃喜燦2021年夏天以借用身份由RB萊比錫加盟狼隊，會方上年正式買斷佢，黃喜燦今季愈戰愈勇，踢15場英超已入8球，等於前2季聯賽入球總和，話唔定將來可以成為另一位孫興民，登入豪門。