祖爾麥迪比傷勢嚴重　面臨長抖

利物浦上場英超以4比3擊敗富咸，但係中堅祖爾麥迪比不幸受傷退下火線，領隊高普透露呢位32歲喀麥隆球星嘅傷勢唔樂觀，可能需要缺陣一段長時間。

據悉祖爾麥迪比右膝受傷，高普被問到呢位防線主力是否會長抖幾個月時，佢話：「醫生話情況唔太樂觀，我哋必須等掃瞄結果，醫生既然咁講，可以想像祖爾麥迪比嘅傷勢應該幾嚴重，估計短期之內難以上陣。」

祖爾麥迪比養傷之下，紅軍將由伊巴希馬干拿迪同華基爾雲迪積克扼守中路，問題係伊巴希馬干拿迪亦經常受傷，如果佢有乜三長兩短，恐怕利物浦防線將會陷入危機。