華拉尼又傷　紅魔鬼生涯提早玩完？

曼聯上場英超擊敗車路士，中堅華拉尼連後備名單都冇份，領隊坦哈格透露呢位30歲法國球星因為背部受傷，所以缺陣，華拉尼今季抖多過踢，加上盛傳佢有意離隊，隨時下月冬季轉會市場重開後走人，提早結束紅魔鬼生涯。

華拉尼2021年夏天由皇馬加盟曼聯之後，經常受傷，今季季初亦因傷缺陣1個月，復出之後淪為後備，過去11場比賽僅1場踢正選，早前已經傳出佢有意離隊，可能去沙特阿拉伯掘金，加上今次又受傷，預料曼聯更加大機會出售佢，籌集資金收購新中堅。

據悉坦哈格希望簽入1位前鋒、1位中場及1位中堅，至於能否喺冬季轉會市場成事，好大程度上要等新股東拉特克利夫入主之後定奪。