祖爾麥迪比提早收咧　或踢完利物浦最後1場

利物浦中堅祖爾麥迪比喺早前對富咸受傷，領隊高普周四(7日)證實，呢位喀麥隆國腳膝部十字韌帶撕裂，今季好大機會唔可以再上陣，由於佢同利物浦合約季尾完結，雙方亦冇聲氣會續約，效力「紅軍」7年嘅祖爾麥迪比或已踢完最後1場利物浦賽事。

高普喺對錫菲聯後宣布：「祖爾麥迪比十字韌帶撕裂，由佢受傷嘅第1秒我已有呢個預感，好不幸成為事實。」呢位32歲中堅今季喺英超上陣10場，其中有9場擔任正選，佢嘅重傷或令球隊需要喺1月轉會窗收購後防球員。

祖爾麥迪比喺2016年由史浩克04加盟，今季係佢效力「紅軍」第8個球季，但合約明年夏天完結，考慮到佢嘅年紀，利物浦多數唔會同佢續約，意味祖爾麥迪比可能冇機會再披利物浦球衣上陣。