比克福特囂張慶祝辣火頭　引爆13人混戰

愛華頓周五(8日)凌晨英超主場3比0大破紐卡素，今季被扣10分後首次逃離降班區，英格蘭門將比克福特賽後疑因為「過火慶祝」，辣着紐卡素球員，先後同般奴古馬雷斯、祖連頓等發生爭執，引發13球員互相推撞，場面混亂。

作為紐卡素死敵新特蘭嘅「出品」，比克福特對「喜鵲」敵意不減，據聞完場後曾喺紐卡素球迷面前滑跪慶祝，般奴古馬雷斯睇唔過眼，手指指咁去質問比克福特，佢同法比安舒哈先後出手推人，祖連頓隨後亦火爆加入戰團，雙方球員隨即加入分開一眾「搞事者」。

紐卡素領隊艾迪侯域賽後試圖淡化事件：「我完全唔知發生咩事，我認為只係球員完場後情緒高漲。」英格蘭足總會唔會就今次事件作出調查，會視乎球證嘅賽後報告點寫再作決定。