森林立立亂！2大功臣慘成「辛祖二世」

諾定咸森林近期立立亂，上場聯賽吞富咸5蛋後聯賽4連敗，傳聞領隊谷巴面臨被炒魷，英國《每日郵報》更披露，森林最近禁止祖禾華爾同史葛麥堅拿參加一隊操練，甚至會喺1月被賣走，而2人並未有任何違反紀律嘅行為，突然遭受「查頓辛祖式」嘅封殺，只因合約問題！

報道指祖禾華爾同史葛麥堅拿近日被禁跟一隊球員操練，而且仲要喺唔同時間、唔同球場單獨練波，消息指2人並冇任何行為上嘅問題，被封殺係因為合約上，球會同佢哋經理人出現糾紛，森林周中對富咸一仗，2人都未有進入大軍名單。

祖禾華爾同史葛麥堅拿都係森林喺2022年重返英超嘅功臣，祖禾華爾今季有6場英超上陣紀錄、史葛麥堅拿亦曾5次披甲，隨住今次「封殺令」出現，森林好大機會喺1月轉會窗將2人賣走。